ငလျင်ဒဏ်သင့် လူမှုအသိုက်အဝန်းများအား ကူညီပံ့ပိုးခြင်း
မြန်မာနိုင်ငံတွင် လှုပ်ခတ်ခဲ့သော ပြင်းထန်သည့် ငလျင်ကြောင့် မန္တလေး၊ နေပြည်တော် အနီးတဝိုက်ရှိ ပြည်သူများမှာ အခက်အခဲများစွာဖြင့် ရင်ဆိုင်နေရပါသည်။ အိမ်ခြေပေါင်းများစွာ ပျက်စီးခဲ့ပြီး သောက်သုံးရေနှင့် စားသုံးကုန် ပြဿနာများအပြင် ကျန်းမာရေး နှင့် ဆေးဝါးကုသရေးဆိုင်ရာ လိုအပ်ချက်များနှင့်လည်း ရင်ဆိုင်နေရပါသည်။ ငလျင်ကြောင့် ပျက်စီးနေသော အဆောက်အဦများနှင့် နောက်ဆက်တွဲ ငလျင်ငယ်များကြောင့် လူအများစုမှာ နေအိမ်များသို့ပြန်ရန် ထိတ်လန့်နေပြီး အပြင်တွင် အိပ်စက်နေကြရပါသည်။
ထို့ကြောင့် ရိုးမလုပ်ငန်းစု၏ လုပ်ငန်းဌာနများမှ လျင်မြန်စွာ ညှိနှိုင်းဆောင်ရွက်ပြီး လိုအပ်သည့် ကူညီထောက်ပံ့မှုများကို ပေးပို့လျက်ရှိပါသည်။
ငလျင်ဒဏ်သင့်ဒေသများတွင် အရေးပေါ် ကယ်ဆယ်ရေး လုပ်ငန်းများ လုပ်ဆောင်ခြင်း
ပြီးခဲ့သည့် တနင်္ဂနွေနေ့တွင် လုပ်ငန်းစုရှိ ဝန်ထမ်းများသည် သောက်ရေဘူးများ ၊ ခေါက်ဆွဲခြောက်နှင့် အခြားအသင့်စား စားသောက်ကုန်များအပြင် အခြားအရေးပေါ်ပစ္စည်းများဖြင့် ရန်ကုန်မှ မန္တလေးသို့ ထွက်ခွာခဲ့ကြပါသည်။ နေအိမ်ပျက်စီးဆုံးရှုံးခဲ့ရသည့် မိသားစုများ၊ ကလေးသူငယ်များအပြင် ဒေသခံ အထောက်အပံ့များနှင့် စျေးဆိုင်များကို အလွယ်တကူ လက်လှမ်းမမီသည့် ပြည်သူများထံ ဦးစားပေး ဖြန့်ဖြူးပေးခဲ့ပါသည်။ နေရာဒေသနှင့် လိုအပ်ချက်အပေါ်မူတည်၍ စားသောက်ကုန်နှင့် ဆေးဝါးပစ္စည်းများကို ဆက်လက်ပေးပို့သွားမှာ ဖြစ်ပါသည်။
ပန်းလှိုင်ဆေးရုံ၏ အရေးပေါ်ကျန်းမာရေးစောင့်ရှောက်မှု
ပန်းလှိုင်ဆေးရုံမှ အဖွဲ့ဝင်များသည် မန္တလေးအထွေထွေရောဂါကုဆေးရုံကြီးတွင် အရေးပေါ်လူနာတင်ယာဉ် ဝန်ဆောင်မှုဖြင့် ထိခိုက်ဒဏ်ရာ ရရှိသူများကို သယ်ယူပို့ဆောင်ပေးလျက် ရှိပါသည်။ ဆေးကုသမှု ခံယူရန် လိုအပ်နေသူများအတွက် လစ်ဟင်းမှု မရှိစေရန် ဆေးကုသရေးအဖွဲ့သားများမှ မနားမနေ ကြိုးစားလုပ်ကိုင်ပေးလျက် ရှိပါသည်။
အစားအသောက် ၊ သန့်ရှင်းမှုနှင့် သယ်ယူပို့ဆောင်ရေး
အချို့နေရာများတွင် လျှပ်စစ်မီး ပြတ်တောက်မှုများကြောင့် မီးဖိုချောင် သုံးစွဲရန် အခက်အခဲရှိသဖြင့် ရိုးမလုပ်ငန်းစု၏ F&B အဖွဲ့မှ မန္တလေး၊ တောင်ကြီးနှင့် နေပြည်တော်ရှိ ယာယီနားနေဆောင်များ၊ ရပ်ရွာခန်းမများနှင့် ပျက်စီးဆုံးရှုံးမှုများသည့် ရပ်ကွက်များတွင် အစားအသောက်များကို နေ့စဥ် ဖြန့်ဖြူးပေးလျက် ရှိပါသည်။
ငလျင်ဒဏ်သင့်ဒေသများတွင် သန့်ရှင်းမှုရှိရန် နှင့် ကူးစက်ရောဂါများမှ ကာကွယ်နိုင်ရန်မှာ လွန်စွာ အရေးကြီးပါသည်။ ကျွန်ုပ်တို့၏ JJ Pun နှင့် Yoma Elevator အဖွဲ့မှ ပိုးသတ်ဆေး ရေဆူဆေးပြားပေါင်း ၁,၈၀၀ ကိုလည်း ကယ်ဆယ်ရေး အဖွဲ့များ အသုံးပြုရန် ပေးပို့ခဲ့ပါသည်။
ထို့အပြင် လမ်းပန်းဆက်သွယ်ရေး ခက်ခဲနေချိန်တွင် ကျွန်ုပ်တို့၏ ကုန်စည်ပို့ဆောင်ရေးအဖွဲ့ KOSPA မှလည်း ငလျင်ဒဏ်သင့်ဒေသများသို့ အလေးချိန် ၄ တန်ခန့် ရှိ စားသောက်ကုန်များ ပေးပို့ရန်အတွက် ပူးပေါင်းဆောင်ရွက်ပေးခဲ့ပါသည်။
စည်းလုံးညီညွတ်စွာ ပါဝင်ဆောင်ရွက်မှု
မိမိတို့၏ လုပ်ငန်းတာဝန်များကို ရပ်ဆိုင်းပြီး ကယ်ဆယ်ရေးလုပ်ငန်းစဉ်များတွင် ပါဝင်ဆောင်ရွက်နေသည့် ကျွန်ုပ်တို့၏ ဝန်ထမ်းများ ၊ စားသောက်ကုန်များနှင့် ပစ္စည်းများ ထုတ်ပိုးရေးအပြင် ဖြန့်ဖြူးရေးအတွက် လုပ်ကိုင်ပေးနေကြသည့် လုပ်အားပေးသူအားလုံး၏ ကြိုးစားအားထုတ်မှုများကို မြင်တွေ့နေရပါသည်။ ထိုလုပ်ဆောင်မှုများသည် တာဝန်ဝတ္တရားအရ လုပ်ဆောင်နေကြခြင်းသာ မဟုတ်ဘဲ မိမိတို့၏ စိတ်စေတနာဖြင့် မိမိတို့နေထိုင်ရာ လူ့အဖွဲ့အစည်းအတွက် ပါဝင်ဆောင်ရွက်နေကြခြင်း ဖြစ်ပါသည်။
ယခုကဲ့သို့ လုပ်ဆောင်မှုများသည် ကနဦးအဆင့်သာ ရှိသေးပြီး လာမည့် ရက်များတွင် ပိုမိုများပြားမည့် အထောက်အပံ့များနှင့် ညှိနှိုင်းဆောင်ရွက်မှုများကို လိုအပ်မှာ ဖြစ်ပါသည်။
